इहि हमर मीत रे
इहि हमर मीत रे
मन के हरे हार रे संगी, मन के जीते जीत रे l
इहि हमर बैरी संगी, इहि हमर मीत रे l 2....
जीवन में सुखी रहना हे त संगी सुन ले मोर गोठ रे l
साधक बनके साध एला, एला कर ले अपन बस म रे l
इहि हमर बैरी संगी, इहि हमर मीत रे l 2....
इहि गिराथे, इहि उठाथे संगी, करवाथे सकल परपंच रे l
इहि रेंगाथे कुपंथ संगी, इहि लेजाथे सुपंथ रे l
इहि हमर बैरी संगी, इहि हमर मीत रे l 2....
जाति-पाति के भेद संगी, इहि भरथे हमर मुड़ी म रे l
कोनो ल कहवावय ऊंच संगी, कोनो ल नीच रे l
इहि हमर बैरी संगी, इहि हमर मिल रे l 2....
कभू बनाये ये ह आलसी संगी, कभू बनाये करमबीर रे l
कभू हसवाथे ये ह संगी, बोहवाथे कभू नयन ले नीर रे l
इहि हमर बैरी संगी, इहि हमर मीत रे l
2.....
मन ल अपन जीत के संगी,सबले जाबे तै जीत रे l
तभे सिरतोन जीत होही संगी, इहि सुग्घर सही रीत रे l
इहि हमर बैरी संगी, इहि हमर मीत रे l 2...
इहि देखावय सरग संगी, इहि देखावय नरक रे l
सियान मन कइथे संगी, ये मन भारी चंचल रे l
इहि हमर बैरी संगी, इहि हमर मीत रे l
2.......
मन के हरे हार रे संगी, मन के जीते जीत रे l
इहि हमर बैरी संगी, इहि हमर मीत रे 2.......