વરસો વાદળ અનરાધાર

પેલો મયૂર કરે ટહૂકાર વરસો વાદળ અનરાધાર,

જળતંગી બની પડકાર વરસો વાદળ અનરાધાર.

ખાલી થયા જળભંડાર; ચારેકોર પાણીના પોકાર,

ગ્રીષ્મ પરાકાષ્ઠા આચાર; વરસો વાદળ અનરાધાર.

પ્રતિક્ષા કરી રહ્યા કૃષિકાર; જળ છે જીવન આધાર,

પનઘટ સૂના ભાસે ભેંકાર; વરસો વાદળ અનરાધાર.

જળવિણ ત્રસ્ત હો સંસાર; પ્રસ્વેદ તનબદને પારાવાર,

માનવમુખે એક ઉચ્ચાર; વરસો વાદળ અનરાધાર.

દીસે ક્યાંક મૃગજળ આકાર; પશુ પક્ષીની તૃષા અપાર;

સૌ આપતા વર્ષાને આવકાર; વરસો વાદળ અનરાધાર.