સંકલ્પ

દ્રઢ મનોબળથી કાર્યસિદ્ધિનો નિર્ધાર લાગે છે સંકલ્પ,

અડધું કાર્ય જાણે પૂર્ણ થયાનો વિચાર લાગે છે સંકલ્પ.

વિકલ્પનો વધુપડતો ન હોય અવકાશ જેનાં જીવનમાં,

આવતી વિટંબણાઓનો ક્યાં કદી ભાર લાગે છે સંકલ્પ.

હરઘડી હરપળ જેને ધ્યેય માત્ર દ્રષ્ટિગોચર થનારું છે,

મહેનત તણા સંગાથે પથિકને આવકાર લાગે છે સંકલ્પ .

અદભુત તાકાત રહી હોય છે કર્મપથના રાહીનાં ડગલે,

એની સફળતાનો એકમાત્ર બસ આધાર લાગે છે સંકલ્પ.

ચૂમે છે કદમોને એનાં વિજય સન્મુખ આવી સન્માનતો,

આયોજન એ જ સિદ્ધિ બનીને શણગાર લાગે છે સંકલ્પ.