વાંચી શકે ખરાં !

પક્ષી ભણ્યાં નથી પણ વાંચી શકે ખરાં;

શાસ્ત્રીયતા વિના પણ ગાઈ શકે ખરાં !

એ એટલું જ જાણે ગાવું ને ઉડવું;

પોતીકા સ્વરને પોતે નાણી શકે ખરાં !

માળાનું વિશ્વ મોઘમ એને બહું થયું--

સ્વપ્નોય પણ સહજતમ લાવી શકે ખરાં !

પળપળ મળ્યા તે સઘળા પાંખો મહીં સજાવી--

શ્વાસોય જિંદગીના ગાળી શકે ખરાં !

જીવન-જગત કે ઈશ્વર ચર્ચાય ક્યાં કરે છે?

ઈશ્વરની બંધ મુઠ્ઠી રાખી શકે ખરાં !

સૂરજની પહેલાં ડૂબી ઊગેય આગવાં--

કલરવથી સારી સૃષ્ટિ થામી શકે ખરાં !

"ગુણવંત" પક્ષી; પવનો; વૃક્ષો; પતંગિયું--

બનતાં જ રંગરંગે ન્હાઈ શકે ખરાં !