કર્મ

કર્મના નામે આ જીવને કેટલો તાવવો છે તારે ?

જીવનના દરેક પથ પર રઝળાવવો છે તારે ?

આ ભવની આંધળી દોટમાં આડેધડ ભગાવવો છે તારે ?

 

એને પૂછ તો ખરો, એને શું જોઈએ છે ?

 

એને તો વનવગડામાં વિના કારણ ફરવું છે.

કિલ્લોલ કરતા ઝરણાં સાથે ખળ ખળ વહેવું છે.

રાત્રીએ ચમકતા આગિયાઓની પૂંછનું અજવાળું ચોરવું છે.

 

અને તું ? જ્યાં ત્યાં કર્મોનો હિસાબ માંડે છે.

ના જાણે પેલા ચિત્રગુપ્તના ચોપડામાં શું આલેખે છે ?

 

જરાક તો ધીમો પડ, ભગવાન, થોડા તો ખમૈયા કર,

જે તને નડતા નથી એને શા સારુ નડે છે ?

 

એકના એક બિંબાઢાળ હિસાબ કર્મોના,

ફૂલડાં કાં ડૂબતા ને પથ્થરો કેમ તરતાં ?

 

કંઈક એમાં નવીનતા તો લાવ, 

રહે ભરોસો તારા પર તને ભજનારનો,

 

એવો કંઈક પરચો તો બતાવ.

કે હવે તો તારા અસ્તિત્વનો એક અહેસાસ દિલાવ.

આવ પ્રભુ આવ.