અરજ
અરજ
કળિયુગના આ કપરા કાળમાં,
ઝાલજે તું મારો હાથ કાનુડા;
મધદરિયે ઝોલાં ખાતી મારી,
જીવન નૈયાને તું તાર કાનુડા.
પોતીકાં પણ થયાં આજ પારકાં,
છે તું જ મારો આધાર કાનુડા;
ભલે આખું જગ કરે તિરસ્કાર,
તું રહેજે મારી સંગાથ કાનુડા.
સત્કર્મોનાં બાંધીએ પોટલાં,
એવું મને ચારિત્ર્ય તું આપ કાનુડા;
પરોપકારનાં ભરી લઈએ ભાથાં,
પછી સ્વર્ગનો રસ્તો બતાવ કાનુડા.
જૂઠી મોહમાયા જગતની છૂટે,
એવી શક્તિ તું આપ કાનુડા;
અબૂધ એવાં તારાં આ બાળને,
શરણે તારાં તું રાખ કાનુડા.