કોઈ સમજે તો સારું !

સ્મિતભર્યા ચહેરા ને બોલતી આંખોમાં ઘૂંટાતાં,

અબોલાં વેણના મર્મ ને કોઈ સમજે તો સારું !

અપેક્ષાના દિવાસ્વપનોથી લથબથ મનમાં ઉમળતાં,

અધૂરાં ઓરતાંઓના ભેદને કોઈ સમજે તો સારું !

સાગરના મોજાંની માફક હિલ્લોળે ચડી ઘૂઘવતાં,

સંવેદના ના પ્રતિસાદ ને કોઈ સમજે તો સારું !

વ્યક્તિત્વની ઝાંખીમાં ખોવાયેલાં હૈયામાં છલકાતાં,

અવિરત લાગણીસભર પ્રેમને કોઈ સમજે તો સારું !

"મનસ્વી" ના અંતરના તિમિર ભર્યાં ઓરડે ડોકાતાં,

પ્રેમ રૂપી દિપકના અજવાશને કોઈ સમજે તો સારું !