બાળકો સૌને લાગે બહુ પ્યારાં
બાળકો સૌને લાગે બહુ પ્યારાં
નાના મહેમાનના આગમનના સમાચાર મળતાં,
સૌના હૈયે અઢળક હેત ને હરખ છલકાતાં,
નવજાત શિશુને સૌ હોંશે ને પ્રેમે વધાવતાં,
આ બાળકો સૌને લાગે બહુ પ્યારાં !
કાલીઘેલી ભાષા ને બોલીથી એ સૌને રિઝવતાં,
બાખોડિયાં ભરતાં, પડતાં આખડતાં તોયે હસતાં,
આડાં અવળાં ડગ માંડીને ચાલતાં શીખતાં,
આ બાળકો સૌને લાગે બહુ પ્યારાં !
નખરાં કરતાં કાયમ ને સૌના મન મોહી લેતાં,
ભોળા ચહેરાની આડમાં ભારે તોફાન છૂપાવતા,
સદાય પોતાની મસ્તીમાં મસ્તમગન એ રહેતાં,
આ બાળકો સૌને લાગે બહુ પ્યારાં !
માન- અપમાન ને સાચાં- ખોટાંની ના એને ખબર,
ના કોઈ પ્રત્યે રાગ-દ્વેષ, ના જવાબદારીની ફિકર,
સૌની સાથે કાયમ હસતાં ને રમતાં એ હરદમ,
આ બાળકો સૌને લાગે બહુ પ્યારાં !