આપણું ઘર

વિધ વિધ અનેરા સંબંધોથી ઓપતું,

લાગણીઓની આભાથી ઝળહળતું;

પ્રેમને હૂંફ ની છાયામાં સચવાતું,

એ જ છે આપણું ઘર મજાનું.

વડીલોની છત્રછાયામાં શ્રેષ્ઠ બનતું,

શિષ્ટાચાર- અનુશાસનથી શિસ્તબદ્ધ થતું;

મા-બાપના સંસ્કારને આશીર્વાદે શોભતું,

એ જ છે ‌આપણું ઘર મજાનું.

ભાઈ-ભાંડુંની રમતો ને તોફાનોથી ગાજતું,

રિસામણાં- મનામણાંની ઘટમાળે જોડાતું;

જતું કરી એકમેક સાથે રહેતાં શીખવતું,

એ જ છે ‌આપણું ઘર મજાનું.

ભાગદોડ ભરી જીંદગીમાં વારંવાર ડખરાતું,

સમયની તંગી ને સંસાધનોની માયામાં ડૂબતું;

તૂટીને વિખરાઈ જાય એ પહેલાં સાચવજો,

એ જ આ આપણું ઘર મજાનું.