શિક્ષક હવે

શિક્ષક હવે દરરોજ શાળામાં જઈ જો કેવો ટેવાઈ ગયો;

પરિપત્રોની આડેધડ ભરમાર વચ્ચે જો કેવો લંબાઈ ગયો !

ઓનલાઈન હાજરી પુરવામાં હવે જો કેવો ખોવાઈ ગયો;

એકમ કસોટીનાં તપાસ ભારણ વચ્ચે જો કેવો દબાઈ ગયો !

નિતનવી આવતી સ્પર્ધાઓ કરવામાં જો કેવો તણાઈ ગયો;

બી.એલ.ઓનો બોજો કાયમનો માથે લઈ જો કેવો બુઝાઈ ગયો !

સ્માર્ટ બોર્ડ પર લેશન આપવામાં જો કેવો થોથવાઈ ગયો;

આચાર્યનાં અપાર સૂચનો પૂરા કરવામાં જો કેવો ડંડાઈ ગયો !

SOEમાં SIને ફાઈલો બતાવવામાં જો કેવો ગભરાઈ ગયો;

બાળક કરતાં શિક્ષકનાં બેગનો ભાર જો કેવો બેવડાઈ ગયો !

FLNનાં આંકડાઓને કાઢવામાં જો કેવો ગૂંચવાઈ ગયો;

બાહ્ય પરીક્ષાઓનાં ફોર્મ ભરવામાં જો કેવો અકળાઈ ગયો !

ગમ્મત સાથે વાર્તા કવિતાઓ કહેતો જો કેવો નજરાઈ ગયો; 

શિક્ષકમાંથી મશીન બનેલો બાળકથી જો કેવો વિખૂટાઈ ગયો !

શિક્ષક દિન ભલે ઉજવાતો શિક્ષક જો કેવો મૂરઝાઈ ગયો;

શિક્ષણ જગતનાં અખતરાઓ વચ્ચે જો કેવો ધરબાઈ ગયો !