મને મંજૂર છે !

બાળપણથી ઘડપણ તણી અવિરત ઘટમાળમાં,

અનેક મીઠાં સંસ્મરણોની વાગોળાતી યાદમાં;

મિત્રવર્તુળ ને સગાંસંબંધીઓની હૂંફ ને સંગાથમાં,

મદમસ્ત બની જીવન જીવવું મને મંજૂર છે !

ક્ષિતિજે પથરાતી સંધ્યાની લાલિમાનાં રંગમાં,

રાતો‌ રંગ ભળ્યો જાણે સાગર તણાં જળમાં;

તેમ કુટુંબ કેરાં વડીલો તણાં અમૂલ્ય ઓછાયામાં,

સંસ્કારનાં પાકાં રંગે રંગાવું મને મંજૂર છે !

પથિક વિરમે ઘનઘોર વડલાની શીતળ છાયામાં,

રહે કુટુંબ અડીખમ જો મોભીઓ હોય પાયામાં;

વ્યવહાર ને સંસ્કાર તણાં સુંદર મજાનાં ઉપવનમાં,

એક કળીની માફક ખીલવું મને મંજૂર છે !

વિચારોની ભિન્નતા છતાં સદા મનમેળ એકમેકમાં,

અતિ અનોખું સૌંદર્ય છે સંબંધોનું આ સંસારમાં;

થોડું પામવાને કાજ કેટલુંય ખોવાની વાટમાં,

હસતાં ન્યોછાવર થવું મને મંજૂર છે !