થોડી બેફિકરાઈ

થોડી બેફિકરાઈ પણ જરૂરી છે 'શૈલ'

ઠાવકા રહીને માથે સફેદી આવી ગઈ !

નિર્દોષ એવી નફ્ફટાઈ પણ શોધી લાવો,

ચિંતાતુર રહી હૃદયમાં નળીઓ જામી ગઈ !

પેલા ભાઈબંધનો ખભો ક્યાં છે હવે ?

સાલું ! એકલા એકલા જિંદગી ગળી ગઈ !

ઉઘાડા પગે લગાવતા દોડ એ શેરી ક્યાં છે ?

આ શહેરોના ડામરને પગની પાની ચોંટી ગઈ !

એ રખડપટ્ટી અને મલકની ધૂળ ત્યાં જ રહી,

ગોઠવીને જીવતાં જિંદગી હપ્તે ચઢી ગઈ !

એ હોંકારા ને તુંકારા નથી પામતો હવે અહીં,

મોટાઈની આ મદભરી ચરબી ચડી ગઈ !

હતા દિવસો લાંબા ને રાતો પણ રઢિયાળી,

ચાંદને મળ્યે તો અહી સદીઓ વીતી ગઈ !

પત્થરે પડતી કેરીઓ ને કુતૂહલની ચણોઠી,

વાટ એ વગડાની ને વાડ કાંટાળી ક્યાં ગઈ ?

આવતી એ યાદ સ્વપ્ને કવચિત્ ઢંઢોળવા મને,

વ્યર્થ નિંદવું હૃદયને, શહેરની હવા લાગી ગઈ !