Library
લાગણી બોલી ગઈ
લાગણી બોલી ગઈ
સહસા આવી ને ધમાલ કરી ગઈ,
આ સૂના હૃદયમાં કાંઈક કમાલ કરી ગઈ !
ચમકતી આંખોના ઈશારે કાંઈક વણકહ્યું કહી ગઈ,
આવી હતી અમસ્તી, પણ મનમાં મસ્તી ભરી ગઈ !
બોલ્યો નથી હું કશુંય છતાં પણ,
જાણે હૃદયથી ઊઠતા તરંગે મને સાંભળી ગઈ !
એના ય હોઠ ક્યાં ખુલ્યા હતા ? છતાં કહી ગઈ,
શબ્દો રહ્યા નિ:સહાય ને અહીં લાગણી બોલી ગઈ !
વાતો આખા જગતની કરતી રહી,
બોલકું એનું મન કહેતું કાંઈક એવું જે સંભળાવી ગઈ !
બહાને બહાને આમ જ આવીને સમીપે રહી ગઈ,
એ 'નજરો'થી જ તો બચવા પાછી દૂર સરકી ગઈ !
ત્રાટક કરવાની રીત નિરાળી એની,
હરતાં ફરતાં ત્રાંસી આંખે ઓલ્યાં તીર છોડતી ગઈ !
દૂરથી ય પાસે લાગે ને, આવી પાસે પાછી દૂર રહી ગઈ,
જકડી લઉં આ હાથોમાં ક્યારેક એવું ય જાણે કહેતી ગઈ !
સ્પંદન આ કંઈ નથી અમથાં જનમ્યાં,
ધીરે ધીરે એ આવી છે મનમાં ને તન ને જગાવી ગઈ !
યાદ કરું છું બંધ આંખે તો ય જાણે તાદ્દશ બની ગઈ,
હવે શું કરું ? જાગુ કે જાઉં ઊંઘી તો ય સન્મુખ રહી ગઈ !
સહસા આવી ને ધમાલ કરી ગઈ,
આ સૂના હૃદયમાં કાંઈક કમાલ કરી ગઈ !
ચમકતી આંખોના ઈશારે કાંઈક વણકહ્યું કહી ગઈ,
આવી હતી અમસ્તી, પણ મનમાં મસ્તી ભરી ગઈ !
