જરાક પલળી જવાયું

થઈ લાગણી સાવ ભીની એટલે જરાક પલળી જવાયું,

મનના આંગણે સાંભળી ટહુકો, આ તો હેવાયા થવાયું,

બાકી, બંદો એટલો ય નથી ખરાબ જેવો તમે ધારો છો !

ક્યાંક આછી વાદળી ને ક્યાંક ઝરમરિયા બની જવાયું,

મારી સમજ પ્રમાણે આ તો મેહુલો મુશળધાર થવાયું,

બાકી, બંદો એટલો ય નથી ખરાબ જેવો તમે ધારો છો !

જો કે વાંક એકલો મારોય ક્યાં છે તમે ય જાણો જ છો,

મેઘભર્યા વાદળની તમે છો સોનેરી કોર મને એવું જણાયું,

બાકી, બંદો એટલો ય નથી ખરાબ જેવો તમે ધારો છો !

એમ દિલફેંક ના ગણી લેશો મને, રાખું છું હૃદય હું સવાયું,

અહીં લાગ્યું, માંગો છો દલડું એટલે ભાવથી અર્પી દેવાયું,

બાકી, બંદો એટલો ય નથી ખરાબ જેવો તમે ધારો છો !

હવે લઈને પાછું આપો ના ભલે પણ ત્રાટક તો ચાલુ રાખો !

નજર હટાવી લીધી એટલે સાવ કોરા ધાકોર થઈ જવાયું,

બાકી, બંદો એટલો ય નથી ખરાબ જેવો તમે ધારો છો !

કહી દો કે ખાલી ગમ્મત હતી એ બધી ને આદત છે તમોને,

રમી લીધું તમે, ને અહી શમણાં કેરૂ કેવું રમખાણ રચાયું !

બાકી, બંદો એટલો ય નથી ખરાબ જેવો તમે ધારો છો !

જરા પાછું વળો કે ફેરવો એ આંખોને એ જ હેતથી અહીં,

તમારી બેરૂખીના બોજથી જુઓ, કેવા અડધા થઈ જવાયું,

બાકી, બંદો એટલો ય નથી ખરાબ જેવો તમે ધારો છો !

થઈ લાગણી સાવ ભીની એટલે જરાક પલળી જવાયું,

મનના આંગણે સાંભળી ટહુકો, આ તો હેવાયા થવાયું,

બાકી, બંદો એટલો ય નથી ખરાબ જેવો તમે ધારો છો !