હા, કશુંક આજ ખૂટે છે
હા, કશુંક આજ ખૂટે છે
હા, કશુંક આજ ખૂટે છે,
તું નથી એ ખ્યાલ રહી રહીને ઊઠે છે,
આમ તો, એ તરંગો હજુયે આ હવામાં છે જ,
તેમ છતાં આ ખાલીપાથી હૃદય ધબકવું ક્યાંક તો ચૂકે છે,
હા, કશુંક આજ ખૂટે છે,
રણકાર એ મજાનો ક્યાં છે ?
રહી રહીને એ સવાલ આ મનમાં ઊઠે છે,
અધર મદભર્યા આજે નથી મલકતા સનમુખ મારી,
છતાં જાણે એ ટહુકો સાંભળી તરંગ મનમાં સહસા ઊઠે છે,
હા, કશુંક આજ ખૂટે છે,
એ સુગંધ આજે ફેલાતી નથી,
આસપાસમાં ય ક્યાંય અણસાર એનો નથી,
મદહોશ કરતી લહેરખી આમ તો મને વીંટળાઈ વહેતી,
આજે નથી છતાં એ અહેસાસના સ્પંદનો મનમાં છૂટે છે,
હા, કશુંક આજ ખૂટે છે,
ચમકતી એ કીકીઓ ક્યાં ?
મને ય જોતી ને નિરખતી રહેતી ચારેકોર પણ,
અટકતી ક્વચિત મુજ પર તીવ્ર ખેંચાણ થકી એમ જ,
હવે, મારી ય આંખોએ નીરખવું આજ શું ? અહીં એ ખૂટે છે,
હા, કશુંક આજ ખૂટે છે,
એ ધબકાર સંભળાતો નથી,
લાગતું કે ધબકે છે ફકત મુજ હૃદય રાગે એ,
સન્મુખ થતાં બેવડાતી એ ધડકનોને શમાવવા મથતી,
એ લાગણીની કોર ભીની સ્પર્શતાં તારી યાદ મનમાં ઊઠે છે,
હા, કશુંક આજ ખૂટે છે,
જાણી ને અજાણી બને છે,
અને, ક્યારેક લાગે કે જાણે મનમાની જ કરે છે,
જિદ્દીપણું જતાવી કોઈ ખાસ હકથી મારા તરફ ફરતી,
હવે, એ હક તે મેળવી લીધો જ જાણે ! તો પછી કેમ રૂઠે છે ?
હા, કશુંક આજ ખૂટે છે,
હા, કશુંક આજ ખૂટે છે,
તું નથી એ ખ્યાલ રહી રહીને ઊઠે છે,
આમ તો, એ તરંગો હજુયે આ હવામાં છે જ,
તેમ છતાં આ ખાલીપાથી હૃદય ધબકવું ક્યાંક તો ચૂકે છે,
હા, કશુંક આજ ખૂટે છે.