તું ત્રિજ્યા ને હું વ્યાસ

તું સીધી ત્રિજ્યા ને હું વર્તુળનો વ્યાસ;

મારા કરતાં તારા પર વધુ વિશ્વાસ.

કાં પાળિયો થઈશ,

કાં થઇ જઈશ પીર;

બિંદુ, રેખાને કિરણ,

મારે છે પ્રેમનાં તીર .

ક્ષેત્રફળ નગરમાં તારી કરી તપાસ;

તું સીધી ત્રિજ્યા ને હું વર્તુળનો વ્યાસ.

તારું હૈયું, મારું હૈયું,

છે સમાંતર ને સમરૂપ;

મારી 'હા'માં 'હા' પાડી દે,

જિંદગી થાશે એકરૂપ.

કાટખૂણાનાં પૂરક થઇ રે' શું આસપાસ;

તું સીધી ત્રિજ્યા ને હું વર્તુળનો વ્યાસ.