તું અને હું, હું અને તું

તું અને હું, હું અને તું,

હિલ્લોળા લેતા પ્રેમ સાગરના પ્રવાસી,

તો યે આપણી વચ્ચે,

ધસમસાટ ધસમસતું આ મૌન કેમ ?

તું દૂર દૂર વસતો આકાશી તારલો,

ને હું એક નાનકડો ટમટમતો દિપ,

તો યે આપણી વચ્ચે,

ટપક ટપક ટપકતું આ અંધારું કેમ ?

તું ટેહૂંક ટેહૂંક ગહેંકતો વનનો મોરલો, 

ને હું સહજ ઝૂકેલી આંબલિયાની ડાળ, 

તો યે આપણી વચ્ચે,

થનગનાટ થનગનતી આ ખામોશી કેમ ?

તું ગડગડાટ ઘૂઘવતો વર્ષાનો મેઘલો,

ને હું ઝબૂક ઝબૂકતી નાનકડી વીજ,

તો ય આપણી વચ્ચે,

ધોધમાર વરસતી આ ઉદાસી કેમ ?

તું પળ પળ સતાવતો પાગલ વાયરો ,

ને હું નવલી નવોઢા સમ ફરફરતી લટ,

તો ય આપણી વચ્ચે, 

ક્ષણ ક્ષણ તરસતી આ શરમ કેમ ?