આસ્થા

ચોક્કસ આસ્થા તમે રાખી શકો;

શરત એટલી કે, 

માપ્યા વગર જો એકમેકને પામી શકો !

બાકી તો, માણસો મળશે હજાર,

હા ! એવું ય બને

માણસ એક ને મહોરા હજાર ! 

જો હીરા પારખુની નજર જેમ પારખી શકો,

હાથમાં હાથ આપનારા પામી શકો;

શરત એટલી કે,

હાથતાળી આપનારાથી અંતર જો રાખી શકો,

બાકી તો, સુખમાં ઉમટે ટોળા અપાર,

હા ! પણ જો પડે ભીડ,

ને ભાંગીને થઈ જાવ લાચાર !

સાથ આપનારા; આંગળીના વેઢે માપી શકો ! 

આંખો મીંચીને, છાતી ઠોકીને શ્રદ્ધા રાખી શકો;

શરત એટલી કે,

મા, જગદંબા કે ઈશ્વરી તત્વ એમાં પિછાણી શકો !

બાકી તો, ત્રિપુંડધારી ને ભગવાધારી મળશે હજાર,

હા ! એવું ય બને,

અંધશ્રદ્ધાના વંટોળ ઘેરે અપાર ! 

અડગ હશે જો શ્રદ્ધા; ખરા માર્ગે જાતને વાળી શકો !