નવું વર્ષ ને સંબંધોની રંગોળી

રમા એકાદશી, વાકબારસ,

ધનતેરસ, રૂપચૌદસ,

દિવાળી ને બેસતું વર્ષ; 

તહેવારો ઉજવવાનો 

સૌને કેટ-કેટલો હર્ષ !

તહેવારોની તૈયારીમાં

કેટલા રહ્યાં સૌ મસ્ત ! 

સગા-વ્હાલાં ને મિત્રો પ્યારાને

શુભેચ્છા પાઠવવામાં વ્યસ્ત,

તારું-મારું ને કજીયા-કંકાસની 

થઈ ગઈ સફાઈ,

લાગણીની ચાસણી નાંખીને

પ્રેમથી બનાવી છે મીઠાઈ ! 

દરેક સંબંધના રંગ છોને જુદા;

પણ અવસર આવો કંઈ ચૂકાઈ ?

દરેક આંગણીયે આજ તો

રંગોળી છે રચાઈ ! 

નવા વર્ષના આ સૂર્યનો

ઉજાસ અનેરો,

આંગણિયે સદા રેલાય,

આપ સૌના હર્ષોલ્લાસના દીવડા 

બારે માસ ઝગમગ થાય !