ચોપાટ

રાતાં, પીળાં લીલાં ને કાળાં,

સોગઠાં જુઓ કેવાં રૂપાળાં !

ચોપાટ ઊપર ચઢવા ખાતર,

થનગની રહ્યાં નખરાળાં, 

પાસાં પડે તો ચઢાય ચોપાટે, 

પઘડું મળે તો ફરાય પટમાં,

મરે ને મારે એકમેકનાં,

ચોપાટ જાણે ફેરવાઈ જંગમાં ! 

તોડ પછી જ સોગઠી બિરાજે ધામે,

ભોગવી કર્મ જ જવાય સ્વધામે,

ગાડું એમાં પાછું ઊંધુ ચાલે ! 

વગર વાંકે સૌને ઊડાડે ! 

ગાંડા ને કાંઈ હોય કોઈ ગામ ? 

તોડ કરો તો જ સિધાવે સ્વધામ !

કર કરે જો કર્મ સારાં,

પાસાં સઘળાં સવળાં તમારાં,

ખોટાં કર્મને પાસા અવળા,

સોગઠી મરે પળભરમાં ! 

ચોપાટનેય મૂળ ચોર્યાસી ખાના,

ને ફૂલડાં બાર ભૌતિક સુખનાં ખજાના !

સંસાર સઘળો રમી રહ્યો ચોપાટે ! 

બાજી તો ખરી હરિનાં હાથે,

હસીને હારીએ, જીતીને મ્હાલીએ,

છીએ સૌ નિમિત્ત માત્ર એ જાણીએ.