એવી મારી હાલત છે

નવલકથા લખતો માણસ

જ્યારે હાયકુ લખવા જાય

એવી મારી હાલત છે,

કલમ જોડે નિસ્બત નથી કાઈ

ને લખું લખું થાય

એવી મારી હાલત છે,

પગલે પગલે ગોથાં ખાતો

તોય પગ થનગનવા જાય

એવી મારી હાલત છે,

ના પૂછો તો બહુ સારું છે

ના રે'વાય ના સહેવાય

એવી મારી હાલત છે,

સામ દામ દંડ ભેદ

બધું મુજ પર અજમાવાય

એવી મારી હાલત છે,

દરિયામાંથી મીઠું બરાબર

આતો કહે છે નદી છુટ્ટી પાડ

એવી મારી હાલત છે,

કરો કતલેઆમ મારી

કાપો પણ લોહી ના નીકળે

એવી મારી હાલત છે,

સમજાવવાનો વખત નથી ને

સાચું ના કહેવાય

એવી મારી હાલત છે,

રણનો પ્રવાસી કાયમનો છું

છતાં મૃગજળ છેતરી જાય

એવી મારી હાલત છે,

લીધા સંગાથે જેને તેને

ખિસ્સા કાપી જાય

એવી મારી હાલત છે,

ચાદર ટૂંકી પગ પહોળા છે

ને ટૂંટિયું ના વળાય

એવી મારી હાલત છે.