જરા મળવાનું રાખો
જરા મળવાનું રાખો
હા, છું માણસ હું બહુ મજાનો, જરા મળવાનું રાખો,
ને, હૃદયથી પણ મોટા ગજાનો, જરા મળવાનું રાખો.
બતાવે બધું સાચું એ અરીસો ભલે હાથ વગો રાખો,
ના જાઓ ચહેરા પર, ભાવ અંતરના કળવાનું રાખો.
થપાટો થકી આ દુનિયાની જડતા વ્યાપી મુખારવિંદે,
કહું છું એટલે જ, રુદિયે બીજ પ્રેમનું રોપવાનું રાખો.
આંખો કહી જાય ઘણું એ તરફ પણ કદી જોવાનું રાખો,
કહી દઉં બધું મોઢા પર હરદમ ના આશ એવી જ રાખો.
આશય છે અર્પવાનો અહીં લેવાની ક્યાં અપેક્ષા છે કોઈ,
વણ કહ્યે પણ એ લાગણીનો પડઘો જરા પાડવાનું રાખો.
રાહ જોઈ જોઈને હવે મનને રાહત રહી નથી જરા પણ,
સમજો ! સફર છે ટૂંકી વાત મોટી, જરા કાને ધરવાનું રાખો.
આમેય ફર્ક હવે શું પડવાનો છે જરા માન રાખી લ્યો તો,
મલકી ઊઠીશું મહેફિલોમાં, અમસ્તું ય વખાણવાનું રાખો.
હા, છું માણસ હું બહુ મજાનો, જરા મળવાનું રાખો.,
ને, હૃદયથી પણ મોટા ગજાનો, જરા મળવાનું રાખો.