આમ કેમ કરે છે ?
આમ કેમ કરે છે ?
જોઉં છું એ ઝખ્મો ને, સદા મરહમનો વેશ ધરીને ફરે છે,
હું તો સાવ ઓળખું જ છું એમને, પછી આમ કેમ કરે છે ?
એ વસે છે તો આ દુનિયામાં જ ને પરલોકી થઈ રહે છે,
રોજ આંખોમાં એમની તાકું છું, પછી આમ કેમ કરે છે ?
કરે છે ઘાત વસમી પણ વર્તને કાંઈક ખાસ થઈ પડે છે,
સહી તો લઉં જ છું એ દગાઓ ! પછી આમ કેમ કરે છે ?
જો મળી જાય રસ્તે તો 'સરવાળા' ની મહેફીલ રચે છે,
'બાદબાકી' હંમેશા મુજને મળે છે, પછી આમ કેમ કરે છે ?
અમસ્તાં, જાણી જોઈ ને ફરજને એ આમ ચૂકતા રહ્યા છે,
એવી ચૂકો ને હું ઝડપતો રહ્યો છું, પછી આમ કેમ કરે છે ?
છે દુનિયાની સફરે ને,વ્યર્થ વાતો-વચનોના ગજવા ભર્યા છે,
જરૂરતના ટાણે જ ખાલી મળ્યા છે, પછી આમ કેમ કરે છે ?
વૈભવ સજાવે છે વર્તનોમાં,જ્યાં મારી હથોટી કાચી પડે છે,
કબૂલ છે કે હેસિયત એ મારી નથી, પછી આમ કેમ કરે છે ?
આ ખામોશીઓ નાસમજ છે એમ ના સમજશો જરા પણ,
એમની ચાલાકીઓ આંખે અડી છે,પછી આમ કેમ કરે છે ?
જોઉં છું એ ઝખ્મો ને, સદા મરહમનો વેશ ધરીને ફરે છે,
હું તો સાવ ઓળખું જ છું એમને, પછી આમ કેમ કરે છે ?