ବାହୁଡିବେ ବୋଲି

ପୌଷ- ମାଘ ଦୁଇ

ଆଗପଛ ହୋଇ

ବାହୁଡିବେ ବୋଲି 

ସଜବାଜ ହେଲେଣି ପରା ।

ଦକ୍ଷିଣା ପବନ

ବହେ ଘନଘନ

ପାଚିଲା ପତ୍ର ଝଡିପଡ଼େ

 ଛାଡି ଗଛର ଡେମ୍ଫ କେରା କେରା ।

ବୋଧେ ଶୀତଋତୁ ଚାଲିଯିବ

ବର୍ଷକ ପାଇଁ ବାହୁଡିବ

ଛାଡିଦେଇ କମ୍ୱଳ ତଳର ଉଷ୍ମତା

ମଇଳା ମଫଲର୍ 

ସୁଇଟର ଜ୍ଯାକେଟ୍

ସବୁ ଲୋଚାକୋଚା ଜୀର୍ଣ୍ଣଶୀର୍ଣ୍ଣ ତିକ୍ତତା ।

ଆମ୍ବ ବଉଳକୁ ଦେଖି

କୃଷ୍ଣଚୂଡ଼ା ହସେ ମୁରୁକେଇ

ନବ ପଲ୍ଲବ ଗଜୁରେ

କଆଁଳ ପତ୍ରରେ ଗଛ ହସୁଥାଇ ।

ପବନର ସ୍ପର୍ଶ ହିଲ୍ଲୋଳରେ ଦେଖ

ଖସିପଡ଼େ କୁଢ଼ କୁଢ ପତର

ପତ୍ରଝଡା ଋତୁ ବୋଧେ ଆରମ୍ଭ 

ଆସିଯିବ ତତଲା ଝାଞ୍ଜି ପ୍ରହର ।

ଶୀତ ଋତୁ ବିଦାୟ ନେବ ଭଲକଥା

କିନ୍ତୁ ପୁଣି ଫେରିବ ଆର ବର୍ଷକୁ

ସମୟ ଚକ୍ରର ଆବର୍ତ୍ତମାନରେ ବି

ଛାଡ଼ ନାହିଁ ଋତୁଚକ୍ର ବିବର୍ତ୍ତନକୁ ।