ତୁମେ ଯଦି ହୁଅ
ତୁମେ ଯଦି ହୁଅ
ତୁମେ ଯଦି ହୁଅ ମଧୁଝରା ଜହ୍ନ
ମୁଁ ହେବି ପୁନେଇ ରାତି
ତୁମେ ଯଦି ହୁଅ ସାଗରେ ଶାମୁକା
ମୁଁ ହେବି ତୁମର ମୋତି ।
ତୁମେ ଯଦି ହୁଅ ଲେଖନୀର ମୂନ
ମୁଁ ହେବି ତୁମ କବିତା
ତୁମେ ଯଦି ହୁଅ ମାଟିର ପ୍ରଦୀପ
ମୁଁ ହେବି ତୁମ ସଳିତା ।
ତୁମେ ଯଦି ହୁଅ ଶ୍ରାବଣର ମାସ
ମୁଁ ହେବି ଧାରା ଶ୍ରାବଣୀ
ତୁମେ ଯଦି ହୁଅ ତନ୍ଦ୍ରା ଭରା ରାତି
ମୁଁ ହେବି ତ ନିଦ ରାଣୀ ।
ତୁମେ ଯଦି ହୁଅ ଗିରି ତରୁ ବନ
ମୁଁ ହେବି ଅଳସୀ ନଈ
ତୁମେ ଯଦି ହୁଅ ଶରୀର ତା'ହେଲେ
ମୁଁ ହେବି ତାହାର ଛାଇ ।
ତୁମେ ଯଦି ହୁଅ ଆଶାର ଆକାଶ
ମୁଁ ହେବି ଆକାଂକ୍ଷା ତାରା
ତୁମେ ଯଦି ହୁଅ ସୁନ୍ଦର ଚିବୁକ
ମୁଁ ହେବି ହସର ଧାରା ।
ତୁମେ ଯଦି ହୁଅ ଅଞ୍ଜନର ଗାର
ମୁଁ ହେବି ମୃଗନୟନୀ
ତୁମେ ଯଦି ହୁଅ ସୁର ଲୟ ତାଳ
ମୁଁ ହେବି ତେବେ ରାଗିଣୀ ।
ତୁମେ ଯଦି ହୁଅ ସାଗର ଲହଡି
ମୁଁ ହେବି ସମୁଦ୍ର ତୀର
ତୁମେ ଯଦି ହୁଅ କୋମଳ ହୃଦୟ
ମୁଁ ହେବି ସ୍ପନ୍ଦନ ତା'ର ।