ପ୍ରେମଡୋରେ ବାନ୍ଧିବା

କିଏ କହେ ପ୍ରେମ ଏକ ସୁନେଲି ସପନ,

କାହା ଲାଗି ରଙ୍ଗଭରା ଗୋଟେ ପୁଷ୍ପବନ ।

କା' ପାଇଁ ସେ ଜହ୍ନ ସାଜି ହାତେ ପଡ଼େ ଖସି,

ପ୍ରେମ ପୁଣି ନଈଟିଏ ବହିଯାଏ ହସି ।

କିଏ କହେ ମାଆ ଗାଳି ଭଳି ସିଏ ମିଠା,

କା' ଲାଗି ସେ ମରୀଚିକା କା' ପାଇଁକି ଅଠା ।

କାହା ଲାଗି ଜୁଇ ଆଉ ଉଆଁସ ଅନ୍ଧାର,

କିଏ କହେ ପ୍ରେମ ଅଟେ ସବୁଠୁ ସୁନ୍ଦର ।

ଇନ୍ଦ୍ରଧନୁ ସାତରଙ୍ଗ ଭରିଛି ତା' ଦେହେ,

ମହୁ ସମ ମଧୁର ସେ ଅନ୍ୟ କେହି କହେ ।

ପ୍ରେମ ଅଟେ ଈଶ୍ବରଙ୍କ ଅନବଦ୍ୟ ସୃଷ୍ଟି,

ବଖାଣନ୍ତି ସେ ପ୍ରକାରେ ଯାହାର ଯା' ଦୃଷ୍ଟି ।

ମୋ ମତରେ ପ୍ରେମ ଡୋରେ ବାନ୍ଧିବା ସଭିଙ୍କୁ,

ହସି ହସାଇବା ସାରା ଜଗତବାସୀଙ୍କୁ ।