ലൈബ്രറി
പ്രൊഫൈൽ
ବିନ୍ଦୁଏ ସିନ୍ଦୁର ପାଇଁ
ବିନ୍ଦୁଏ ସିନ୍ଦୁର ପାଇଁ
1 min
420
ସହ୍ୟ ଅସହ୍ୟ
ଯେତେ ସବୁ ଦେଇଛ ଯନ୍ତ୍ରଣା
ସହିଗଲା ପରେ
ଶ୍ରାବ୍ୟ ଅଶ୍ରାବ୍ୟ
ସବୁ ଶୁଣିଲା ପରେ
ବ୍ୟକ୍ତ ଅବ୍ୟକ୍ତ
ସବୁ ବେଦନାକୁ
ହୃଦୟରେ ସାଇତି ଦେଲା ପରେ
ଆଉ କଣ ବାକି ଅଛି
ତୁମକୁ ଶାନ୍ତ ଆଉ ଶକ୍ତ କରିବାକୁ ?
ମୁଁ ତୁମର ସେଇ ଅବିଚ୍ଛେଦ୍ୟ ଅଙ୍ଗ
ଯାହା ପାଇଁ ତୁମର ଭିନ୍ନ ଏକ ପରିଚୟ
ଦୁନିଆ ଆଖିରେ ମୁଁ ସେଇ ଅର୍ଧାଙ୍ଗିନୀ
ଯାହା ମଥାରେ ଭରିଦେଇ ବିନ୍ଦୁଏ ସିନ୍ଦୁର
ତୁମେ ବୋଲାଉଛ ପତି, ପୁରୁଷ ଆଉ ପରମେଶ୍ୱର ।
ସେଇ ବିନ୍ଦୁଏ ସିନ୍ଦୁର ପାଇଁ
ଅନେକ ଶୁଣିଛି
ଅନେକ ସହିଛି
ତଥାପି ରହିଛି ଅବହେଳିତ ହୋଇ
ଅନେକ ପରୀକ୍ଷା କରିଛି
ତୁମ ଅଶାନ୍ତ ହୃଦୟରେ
ପରିତୃପ୍ତି ଆଣିଦେବା ପାଇଁ
କିନ୍ତୁ ପାରିନି
ତୁମ ପ୍ରେମିକ ମନକୁ ଖୋଜିବାକୁ ଯାଇ
ମୁଁ ନିଜେ ହଜିଯାଇଛି
ତୁମ ପ୍ରଶ୍ନର କୋଳାହଳ ଭିତରେ
ଅବଳା ନୁହେଁ ମୁଁ
ତଥାପି ରହିଛି ଏଠି
କେବଳ ତୁମେ ଦେଇଥିବା ସିନ୍ଦୁର ବିନ୍ଦୁର
ମାନ ରକ୍ଷା ପାଇଁ...
