ପ୍ରତିକ୍ଷାରେ ମୁଁ

ମୋ ମନର ଅଗଣାରେ କଳିକାଟେ ଫୁଟିଛି

ଫୁଟିବାକୁ ଫୁଲ ହୋଇ ଅପେକ୍ଷାରେ ରହିଛି

ସାରା ଜଗତରେ ବିତରିବ ତା'ର ମହକ

ସବୁରି ମନରେ ସିଏ ଭରିଦେବ ପୁଲକ ।

ମୋ ଆଖିର ଝରକାରେ ପରୀଟିଏ ବସିଛି

ମୋ ସ୍ୱପ୍ନର କୋଠରୀକୁ ଧୀରେ ଧୀରେ ପଶୁଛି

ମୋ ମନର ରାଇଜରେ କରିବ ବିଚରଣ

ମୋ'ର ସବୁ ସପନକୁ କରିବ ସେ ପୂରଣ ।

ମୋ ଆଶାର ଆକାଶରେ ତାରାଟିଏ ଉଇଁଛି

ଆକାଶର କୋଳ ଭରି ଓଠ ଖୋଲି ହସୁଛି

ସୁକ୍ଷ୍ମ ତା'ର ଶରୀରରୁ ଝରାଇବ ଆଲୋକ

ନିରାଶାର ଅନ୍ଧାରରେ ସେ ଯେ ଟିକି ପ୍ରଦୀପ ।

ମୋ ହୃଦୟ ଆଇନାରେ କାହା ମୁହଁ ଦିଶୁଛି

କୁନି କୁନି ଆଖିରେ ତା' ମତେ ସିଏ ଦେଖୁଛି

ଓଠୁଁ ତା'ର ଝରିଯାଏ ପିୟୁଷର ଶ୍ରାବଣ

ଦେହେ ମୋ'ର ଖେଳିଯାଏ ଅପୂର୍ବ ଶିହରଣ ।