ଲୀଳାମୟ କାହ୍ନା
ଲୀଳାମୟ କାହ୍ନା
କାହ୍ନୁ ପରି କିଏ ହେବ ସଖୀ କହ
କାହ୍ନୁ ପରି ଆଉ କେ ହେବ
ପର ଘରେ ପଶି ଦହିହାଣ୍ଡି ଭାଙ୍ଗି
ଲବଣୀ ଚୋରାଇ ଖାଇବ I
ଲୁଚି ଲୁଚି କିଏ ଗୋପାଳୁଣୀଙ୍କର
ବାଟ ଜଗି ବସି ରହିବ
ଗାଧୁଆ ତୁଠରୁ ଲୁଗା ଚୋରୀ କରି
ଗଛେ ଡାଳେ ମଜା ଦେଖିବ I
ମନେ ପଡିଗଲେ ରାଧା କଥା ତାର
ବଇଁଶୀରେ ସ୍ୱର ତୋଳିବ
ଗାଈ ଗୋଠ ନେଇ ବନସ୍ତ ମଧ୍ୟରେ
ସାଙ୍ଗ ସାଥୀ ମେଳେ ଖେଳିବ I
ଅନ୍ଧାର ରାତିରେ ଗୋପୀଗଣ ସାଥେ
କୁଞ୍ଜବନେ କେଳି କରିବ
ଇନ୍ଦ୍ର କୋପ କଲେ କାଣି ଆଙ୍ଗୁଠିରେ
ଗିରି ଗୋବର୍ଦ୍ଧନ ଟେକିବ I
ଡର ଭୟ ଛାଡି ଫଣାପରେ ନାଚି
କାଳିୟ ଦଳନ କରିବ
ତା'ପରି ଛୋଟିଆ ପିଲାଟିଏ କିଏ
ଅସୁରଙ୍କ ସହ ଲଢିବ I
ପ୍ରବଳ ପ୍ରତାପୀ କଂସାସୁର ପ୍ରାଣ
ତା ଭିନ୍ନ ଆଉ କେ ନାଶିବ
ସେ ଯେ ଲୀଳାମୟ ସ୍ୱୟଂ ନାରାୟଣ
କିଏ ବା କାହିଁକି ଜାଣିବ I