Library
Profile
ପ୍ରେମର ପସରା
ପ୍ରେମର ପସରା
କେଉଁଠି ଢାଳିବି ନୟନ ଯୁଗଳ
ଅନିନ୍ଦ୍ୟ ସୁନ୍ଦରେ ଭରା
ସଭି ଦଶ ଦିଶେ କୋଣେ ଅନୁକୋଣେ
ପୀରତି ଦିଏ ପହରା ।୧।
ସକାଳୁ ଚାହିଁଲି ପୂରୁବ ଆକାଶେ
ସେନେହ ମୂରୁଜ ଢାଳି
ଶୁଶୋଭିତ ଯେହ୍ନେ ପରମାତ୍ମା ସଙ୍ଗେ
ଜୀବାତ୍ମା ଯାଆନ୍ତି ମିଳି ।୨।
ଧୀରେ ଧୀରେ ତୁମ ବଦନ କମଳେ
ଫୁଟି ଉଠେ ସ୍ମିତ ହାସ
ପ୍ରଶାନ୍ତ ପ୍ରସନ୍ନ ଗୌତମ ଯେସନେ
ପାଇ ଆଲୋକ ଆଭାସ ।୩।
ଅଳସ ନୟନେ ଚାହେଁ ଅଗଣାରେ
ପ୍ରଭୁ ଶ୍ରୀରାମ ପୀରତି
ପିଠିରେ ରଙ୍ଗେଇ ଖେଳଇ ଗୁଣ୍ଡୁଚି
କରମ ଦିଏ କୀରତି ।୪।
ଅନତି ଦୂରରେ ପିଜୁଳି ଡାଳରେ
ହନୁ ଫଳ ଆସ୍ବାଦନ
କି ଆଶିଷ ଦେଲ ସାତ କଳେ ଲାଗେ
ସକଳେ ସୁଧା ସମାନ ।୫।
କେଉଁଠି ଅଛ ଗୋ ଏଇଠି ମୁଁ ଅଛି
କପୋତୀ ଘୁଟୁରୁ ସ୍ଵନ
କପୋତ ଘୁମୁରେ ଆସୁଛି ଗୋ ପ୍ରିୟେ
ଶ୍ରଦ୍ଧା ପ୍ରେମ ହିଁ ଜୀବନ ।୬।
ପିଞ୍ଜରା
ରେ ବଦ୍ଧ ଶାରୀ ବୋଲେ ପ୍ରିୟେ
ଖେଦ ନକରି ପ୍ରେମରେ
ବିତେଇବା ଦିନ ରମେ ନର ଦେଖ
ବଦ୍ଧ ହୋଇଣ ଶରୀରେ ।୭।
ବାୟା କହେ ଏହା ବସା ନୋହେ ଦୋଳି
ଆନନ୍ଦେ ସଙ୍ଗୀତ ଗାଇ
ପ୍ରେମରେ ଜୀବନ ବିତୁ ଭାସିଯିବା
ପିମ୍ପୁଡିରେ କୁଟା ଦେଇ ।୮।
ବଗୁଲା ବଗୁଲି ଥଣ୍ଟେ ଥଣ୍ଟ ଦେଇ
ଶରଧା ନିଅନ୍ତି ବାଣ୍ଟି
ବଣି ଯୋଡି କେବେ ନୁହନ୍ତି ବିଚ୍ଛେଦ
ସଙ୍ଗତେ ତୁଟଇ ଭ୍ରାନ୍ତି ।୯।
ଗୃହର ସମୀପ ସରେ ସରସିଜ
ପ୍ରେମେ ପୁଲକିତ ପ୍ରାଣେ
କେଡେ ସରାଗରେ ଆଲିଙ୍ଗନେ ବନ୍ଧା
ପ୍ରିୟାର କର କିରଣେ ।୧୦।
ଛାଡି ଯାଉଁ ରବି ଗୋଧୂଳି ରକ୍ତିମ
ବ୍ରୀଡାଭରେ ନଭରାଣୀ
ଅସଂଖ୍ୟ ନୟନେ ପ୍ରୀତି ସନ୍ଦର୍ଶନେ
ରାତ୍ରି କାଟେ ବିରହିଣୀ ।୧୧।
ବାତାବରଣରେ ସ୍ନେହ ଶ୍ରଦ୍ଧା ପ୍ରେମ
ଭରା ସୁଗନ୍ଧିତ ବାଆ
ପ୍ରେମର ପସରା ଦେଖିବ ସରଗ
ଆସିଛି କି ମୋର ଗାଁ ।୧୨।
