ଅଭିସାରିଣୀ
ଅଭିସାରିଣୀ
ଓଠେ ସ୍ମିତ ହସ ନୀରବେ ବିତରେ
ଅନ୍ତରର ପରିଭାଷା
ସପ୍ତରଙ୍ଗେ ସଜା ସପନ ଅନେକ
ଆବେଗଭରା ଅଭିପ୍ସା ।
ନୟନ କୋଣରେ ଭରିରହିଅଛି
ଆକାଶଛୁଆଁ କାମନା
ପଲକପତନ ଗାଏ ଆଗମନୀ
ସଜାଏ ମନୋବାସନା ।
ଅମାନିଆ କେଶ ଅପେକ୍ଷାରେ ରତ
ପରଶ କରକମଳ
ଅନାଛ୍ଛାଦିତ ଦରକଣ୍ଠ ଯେହ୍ନେ
ପିୟ ଚୁମ୍ବନ ବ୍ଯାକୁଳ ।
ଆଜାନୁଲମ୍ବିତ- ବାହୁ ବାନ୍ଧି ପ୍ରିୟେ
ରଖିବ ସପ୍ତ ଜନମ
ଉରଦେଶେ ସୁଖେ ବଦନ ନିବେଶି
ଭୁଲିବ ହୃଦ ଦହନ ।
ଚଞ୍ଚଳ କୋମଳ ବେନିପଦ ହୁଏ
ଅଚଞ୍ଚଳେ ଅଗ୍ରସର
ଯେସନେ ସମ୍ମୁଖେ ଉଭାହୋଇଛନ୍ତି
ହୃଦୟର ଗଳାହାର ।
ବକ୍ଷୋଜ ଆବୋରି ରଖିଛି ଲଳନା
ଲଳିତ ଝୀନବସନେ
ମନ୍ଦୋଦର ସଂଗେ ଶୋଭାପାଏ ଚାରୁ
ଗିରି ଉପତ୍ଯକା ଯେହ୍ନେ ।
କାମନା ବାସନା- ସିକ୍ତା ଉନ୍ମାଦରେ
ସଜାଇଛି ତନ ମନ
ସର୍ବସ୍ୱ ସମର୍ପି ଅଭିସାରିଣୀ ସେ
ପ୍ରିୟରେ ହେବ ବିଲୀନ ।