ବଉଳକୁ ପଦେ
ବଉଳକୁ ପଦେ
କେରି କେରି ଆମ୍ବ ବଉଳ
ମନେ ଝରେ ସାଙ୍ଗ ସରିସା ସରାଗ
ତୋଳିଲେ ଶ୍ରଦ୍ଧା ଦେଉଳ ଲୋ ବଉଳ ।
ବଉଳ କଣିରେ ପ୍ରେମ
ଆଁ କରି ପାଟି ହେଲେ ପକା ପକି
ସାଙ୍ଗ ହେଲେ ସାତ ଜନ୍ମ ଲୋ ବଉଳ ।
ଅଥଳ ଦୁନିଆ ବାରି
ପାରି ହେଉଥିବା ବନ୍ଧୁତ୍ୱ ନାଆରେ
ବଉଳ ଆହୁଲା ଧରି ଲୋ ବଉଳ ।
ବଉଳ ଅମାବାସ୍ଯାରେ
ପକୃତିର ପୂଜା ସାଙ୍ଗ ସାଥୀ ମଜା
ମନେ ପଡ଼ିଲା ଯେ ଝୁରେ ଲୋ ବଉଳ ।
ରଖିଛୁ କି ନାହିଁ ମନେ
ମୋର ବାହା ଦିନ କହିଥିଲୁ ମୋତେ
ଭୋଳ ହେବୁ ନାହିଁ ଧନେ ଲୋ ବଉଳ ।
ସେନେହ ମମତା ଡୋରି
କିଣି ନବୁ ଘରେ ମନ ସବୁରି ଯେ
ତୋତେ ହେଉଥିବେ ଝୁରି ଲୋ ବଉଳ ।
ଦିଅର ନଣନ୍ଦ ଥଟ୍ଟା
ଖଣ୍ଡାଧାର ଚାଲି ନହେଉ ଓଲଟା
ହସଖୁସି ମିଠା କଥା ଲୋ ବଉଳ ।
ଚଳୁଛି ତୋ କଥା ମାନି
ଶାଶୁ ଶ୍ୱଶୁର ଯେ ଝିଅ କଲେ ମୋତେ
ବାପା ମା ମନେ ପଡ଼ୁନି ଲୋ ବଉଳ ।
ୟାଙ୍କ ଗୁଣ କି ଗାଇବି
ଚିକଣ ଚାକଣ ଗେଲ ତେଲ କଥା
ଦେଖିଲେ ତୋତେ କହିବି ଲୋ ବଉଳ ।
ଆଖି ନାକ ଓଠ କେଶ
ଏସବୁ କାଳେ ମୋ ଏଡ଼େ ସରସ ଯେ
ଫୁଲି ଉଠେ ତାଙ୍କ ନିଶ ଲୋ ବଉଳ ।
ଜହ୍ନିଓଷା ପୂଣ୍ଯ ବଳେ
ସୁଖରେ ରହିଲି ଶାନ୍ତି ଭୋଗ କଲି
ତୋ ପାଇଁ ଅରଘ ଢ଼ାଳେ ଲୋ ବଉଳ ।