ବନ୍ଧନ
ବନ୍ଧନ
କହନ୍ତି ବନ୍ଧନ ଦୁଃଖର କାରଣ
ଭିନ୍ନ ଭାବ ଆସେ ମନେ
ପ୍ରଥମ ଦର୍ଶନେ ପ୍ରେମ ଶିହରଣେ
ଭରିଥିଲା ମନେ କୋଣେ ଅନୁକୋଣେ
ଅନେକ ସପନ
ବନ୍ଧନ ପ୍ରସୂନ
ସଞ୍ଚରଇ ଅନୁକ୍ଷଣେ ।୧।
ପ୍ରୀତି ମଧୁଚ୍ଛନ୍ଦା ପ୍ରେମେ ହୋଇ ବନ୍ଧା
ବିଷମ ଭବସାଗର
ଏକା ଏକା ଡରେ ଜୁଆର ଭଟ୍ଟାରେ
ପ୍ରିୟା ପ୍ରେମଡ଼ୋରେ ସୁଦୃଢ଼ ରଜୁରେ
ବାନ୍ଧିଦେଇ ଭେଳା
ସାହା ଚକାଡ଼ୋଳା
ସାନନ୍ଦେ ହୁଅଇ ପାର ।୨।
ରବି କର କରେ ନୀଳ ସରୋବରେ
ଲାସ୍ୟମୟୀ ପଙ୍କଜିନୀ
ଚନ୍ଦ୍ରମା କିରଣ କରି ସମ୍ଭାଷଣ
ପ୍ରେମେ ଆହ୍ଲାଦିନୀ ହୁଏ କୁମୁଦିନୀ
ବନ୍ଧନ ଆଧାର
ଅନ୍ୟଥା ଅସାର
ଅଭାଗିନୀ ବିରହିଣୀ ।୩।
ବାନ୍ଧି ଗୋପିଗଣ ସେ ଛନ୍ଦାଚରଣ
ସ୍ନେହ ଶ୍ରଦ୍ଧା ପ୍ରେମ ଡ଼ୋରେ
ବାନ୍ଧଇ ଶବରୀ ଶ୍ରଦ୍ଧା ରଜୁ ଧରି
ପାର୍ଥ ହଳଧର ସଖା ସହୋଦର
ଲଭନ୍ତି ପରମ
ଦେବମୟ ଧାମ
ଭାବମୟ ବନ୍ଧନରେ ।୪।
ବନ୍ଧନେ ବନ୍ଧନ କରି ଜନମନ
ସହୃଦୟ ସବିବେକ
ବିତରିବା ପ୍ରେମ ସେବା ପୂଣ୍ୟ କର୍ମ
ଜନ ହିତେ ଲୟ ବିଶ୍ୱ ନିରାମୟ
ସୁଖୀ ଜଗଜ୍ଜନେ
ଜଗାଇବେ ମନେ
ବନ୍ଧନ ସୁଖଦାୟକ ।୫।