କହିଲେ ବଢ଼ିଆ ଅତି

ରଜ ଖିଲିପାନ ଖାଇ

ଦୋଳିରେ ଝୁଲୁଚି ପାକେଇ ଆଈ

କେତେ ବାଗେ ଗୀତ ଗାଇ ।

ନାତି ନାତୁଣୀଏଁ ମିଶି

ଗୀତ ଶୁଣୁଥିଲେ ମୁରୁକି ହସି

ଅଜା ଯାଉଥିଲେ ଖସି ।

ପିଲାଏ ଆଣିଲେ ଧରି

ପିଠା ଖଣ୍ଡେ ଦେଲେ ମୁହଁରେ ଭରି 

କିଛି ଠାରି ତୁନି କରି ।

ଆଈ ଝୁଲି ଝୁଲି ଦୋଳି

ପକାଇଲା ଦି' ଥର ହୁଳହୁଳି

ଶୁଣି ଅଜା ଦେଲେ ଗାଳି ।

ତହିଁକି ନ ଦେଇ ଧ୍ୟାନ

ଆଈ ବୋଲିଲେ ହେ ପରାଣ ଧନ

କୌଶଳେ ମୋହିଲ ମନ ।

ଗାଁ ଯାତରେ ଅଭିନୟ

କର୍ଣ୍ଣ ସାଜି କଲ ହୃଦୟ ଜୟ

ସାହସ କଲି ସଞ୍ଚୟ ।

ବାସ ଅତର ଲଗାଇ

ପତର ଲେଖିଲି ଗୁପତେ ଯାଇ

ଜାଣି ଦେଲା କେହ୍ନେ ଭାଇ ।

କହିଲା ବାପାଙ୍କ ଆଗେ

ଶୁଣି ଗଲେ ତୁମ ଘରକୁ ବେଗେ

ପ୍ରସ୍ତାବଟି ଦେଲେ ବାଗେ ।

ତା' ପର ତିଥିରେ ବାହା

କହିଦେଲି ଆମ କାହାଣୀ ଯାହା

ଏ ଯାଏ ଠାକୁର ସାହା ।

ଆଈ ତୁଣ୍ଡୁ ଅନୁଭୂତି

ଗୀତକୁ ଶୁଣିଣ ନାତୁଣୀ ନାତି

କହିଲେ ବଢ଼ିଆ ଅତି ।