ହସ
ହସ
ଜେଜେ ବସିଥିଲେ ପିଣ୍ଡା ଉପରେ
ଆସି ମିଳିଗଲେ ଭେଣ୍ଡିଆ ଦଳେ |
ବୁଢ଼ା ସଙ୍ଗେ ଗେଲେ ଲାଗିଲେ ଯାଇ
ସବୁଠୁଁ ବଳୁଆ ନିଧିଆ ଭାଇ |
ଜେଜେଙ୍କୁ କହିଲା ଲଢ଼ିବା ପାଇଁ
ବାହାସ୍ଫୋଟ ମାରେ ଜଙ୍ଘ ବାଡେଇ |
ଜେଜେ ବାମ ହାତ ଦେଲେ ଛିଞ୍ଛାଡ଼ି
ପଡ଼ିଲା ନିଧିଆ ମୁହଁକୁ ମାଡ଼ି |
ହସି ହସି ସବୁ ମାରିଲେ ତାଳି
ବଳୁଆ ମୁହଁରେ ଲାଗିଲା କାଳି |
ହସି ହସି ମୁହିଁ ହାଟକୁ ଗଲି
ମୁରୁକି ମୁରୁକି ମୁଁ ହସୁଥିଲି |
ବାଟରେ ଭେଟିଲି ରିକ୍ସାବାଲାକୁ
ହସିଦେଲା ଚାହିଁ ମୋର ମୁହଁକୁ |
କାଠୁରିଆଟିଏ ମୋତେ ଦେଖିଲା
ମୁରୁକି ମୁରୁକି ସିଏ ହସିଲା |
ଯାଉ ଟିକେ ଦୂର ପୋଲିସ ଭାଇ
ହସିଦେଲା ଟିକେ ମୋତେ ଅନାଇ |
ଯେତେ ବେଳଯାଏ ମୋ ମୁହେଁ ହସ
ଯିଏ ସେ ଦେଖିଲା ହସେ ଅବଶ୍ୟ |
ଏହି ସମୟରେ ସ୍କୁଟିରେ ବସି
ଆସୁଥିଲେ ଜଣେ ଚାରୁ ରୂପସୀ |
ମୋ ମୁହଁକୁ ଚାହିଁ ଦିଅନ୍ତେ ହସି
ଭାରସାମ୍ୟ ହାରି ପଡ଼ିଲେ ଖସି |
ସ୍କୁଟିକୁ ଉଠାଇ ତାକୁ ଉଦ୍ଧରି
ହସର ଉପରେ ହସ ଲହରୀ ||