ସ୍ୱାଧୀନ ଦେଶର ସନ୍ତାନ ଆମେ

ସ୍ୱାଧୀନ ଦେଶର ସନ୍ତାନ ଆମେ

    ସବୁଠାରୁ ଅଟୁ ଭାଗ୍ୟବାନ

ସାହସ ଶକତି ସମ୍ବଳ ଆମର

   ସିଂହଶିଶୁ ଆମେ ବଳବାନ ।

ମହାଭାରତର ଆର୍ଯ୍ୟ ଦାୟାଦ

    ଭୟ ନାହିଁ ଆମ ଜାତକରେ

ଜ୍ଞାନ ବିଜ୍ଞାନରେ ଧର୍ମରେ କର୍ମରେ

    ଅଗ୍ରଣୀ ଆମେ ଜଗତରେ ।

ଅନ୍ଧକାରେ ଆମେ ଶିକ୍ଷାର ଆଲୋକ

   ଜାଳିଦେଉ ସାରା ମରତରେ

ଶାନ୍ତି ମୈତ୍ରୀ ପ୍ରୀତି ବିଶ୍ୱଭାତୃଭାବ

   ବହେ ସଦା ଆମ ରକତରେ ।

ଗୀତା ଭାଗବତ ବେଦ ବେଦାନ୍ତର

   ଦର୍ଶନ ଅଛିଏ ଭାରତରେ

ବିଶ୍ଵଗୁରୁ ଦେଶ ବିଶ୍ୱରେ ଉତ୍କର୍ଷ

  ସାରା ରସା ଯାକୁ ଅନୁସରେ ।

ନର ନାରାୟଣ ନାରୀ ନାରାୟଣୀ

  ଗୋ ଗଙ୍ଗା ତ୍ରିରଙ୍ଗା ପୂଜା ପାଏ

ତରୁ ଲତା ପଶୁ ପକ୍ଷୀ ନଦ ନଦୀ

   ଦେବତା ହୋଇକି କଥା କହେ ।

ସ୍ୱୟଂ ବ୍ରହ୍ମରାଶି ମାନବ ଦେହରେ

   ଏପୂଣ୍ୟ ମାଟିରେ ଲୀଳା କରେ

ରାମ କୃଷ୍ଣ, ବୁଦ୍ଧ, ଶଙ୍କର ଚୈତନ୍ୟ

  ରୂପେ ବିହରିଲେ ଭାରତରେ ।

ଦେଶ ଜାତିପାଇଁ ପ୍ରାଣ ବଳି ଦେଇ

  ରଖିବା ତା ମାନ ଉଚ୍ଚ କରି

ସବୁଠୁଁ ସରସ ଭାରତ ବରଷ

  ଯଶ ଗାଉ ସାରା ବସୁନ୍ଧରୀ ।