ଏଇ ଭାରତରେ

ଏଇ ଭାରତରେ ଆର୍ଯ୍ୟାବରତ୍ତରେ

  ଜ୍ଞାନର ଆଲୋକ ଜଳେ

ଜାପାନ ଭୂଖଣ୍ଡୁ ମେକସିକୋ ଯାଏ

  ପ୍ରତିଫଳେ ସମୁଜ୍ଜଳେ l 1

ସର୍ବ ପୁରାତନ ଆଦି ସନାତନ

  ଦେଶ ରୂପେ ମହୀ ତଳେ

ରାମାୟଣ ମହାଭାରତର ସାକ୍ଷୀ

  ଆଧ୍ୟାତ୍ମିକ ଶକ୍ତି ବଳେ l 2

ଏଠି ସେତୁବନ୍ଧ ସମୁଦ୍ର ସଲୀଳେ

   ଗଢ଼ା ହୁଏ ଅବହେଳେ 

ଦ୍ଵାରକା ନଗରୀ ରମ୍ୟ କୁଶ ସ୍ଥଳି

  ବିରାଜେ ସାଗର ତଳେ l 3

ଯହିଁ ହିମଗିରି ଉଦୀଚି ଆବୋରି

    ଶୋହେ ଦୂର ଚକ୍ରବାଳେ

କଟିରେ ବିନ୍ଧ୍ୟାଦ୍ରି ଉଭା ନଭ ଭେଦୀ

    ମର୍କତ ମଣି ମେଖଳେ। l 4

ପୟରେ ପୟୋଧି ଯା ଚରଣ ବନ୍ଦି

   ଲୋଟେ ଉତ୍ତାଳ କଲ୍ଲୋଳେ

ବେନି ପାରୁଶରେ ଅର୍ଣ୍ଣବ ସାଦରେ

  ଵିଞ୍ଚଇ ମରୁତ କରେ। l 5

ବୁଦ୍ଧ ଗାନ୍ଧି ଶଙ୍କର ଚୈତନ୍ୟ

   ଜନ୍ମ ନେଲେ ଯାର କୋଳେ

ଅହିଂସା ସତ୍ୟର ଅମୀୟ ମନ୍ତର

   ପ୍ରଚାରିଲେ ମହୀ ତଳେ l 6

ବିଷ୍ଣୁ ନଖାଶ୍ରିତ  ସ୍ଵର୍ଣ୍ଣଦୀ ଆନୀତ

  ଭଗୀରଥ ତପ ବଳେ

ଖୋଲିଲେ ସାଗର ସଗର ନୃବର

   କୀର୍ତ୍ତି ରଖି ଉର୍ଜ୍ଜସ୍ୱଳେ l 7

ଆମ ଦେଶ ଯଶ ଗାଏ ଇତିହାସ

   ଲେଖା ଅମର ଅକ୍ଷରେ

ଥିଲୁ ବିଶ୍ଵଗୁରୁ ଅଛୁ ବିଶ୍ଵଗୁରୁ

   ବନ୍ଦିତ ମହୀ ମଣ୍ଡଳେ l 8