ସରକାରୀ ଡାକତର

ଧନ୍ୟ ଆମ ସରକାରୀ ଡାକତର

ତାଙ୍କ କଥା ଶୁଣି ମାଡୁଅଛି ଡର।

ସରକାର ଦିଅନ୍ତି ଦରମା ଭଲ

ରୋଗୀଙ୍କୁ ଏମାନେ ମାଗିଥାନ୍ତି ମୂଲ।

ପରାମର୍ଶ ତାଙ୍କ ନର୍ସିଂହୋମ ଭଲ

ତେବେ କାହିଁପାଇଁ ଯିବା ମେଡିକଲ।

ଦୁଃଖ କଥା କି କହିବି ଭାଇ ଶୁଣ

ଡେଲିଭରି ପାଇଁ ଯାଇଥିଲି ଜାଣ।

ହସପିଟାଲରେ ହେଲି ଆଡ୍ମିସନ

କି କହିବି ଭାଇ ଯେଉଁ ଟେନସନ।

ଡାକତର ସଫା ସଫା କହିଦେଲେ

ହେବନାହିଁ କେବେହେଲେ ନରମାଲ।

ମୁହେଁ ମୁହେଁ କହିଦେଲେ ଛୁଆ ତୋର

ମରିଗଲେ ଦେବୁନାହିଁ ଦୋଷ ମୋର।

ଏମିତିକା କଥା ଶୁଣି ବାର ବାର

କେଉଁ ପରି ସହିବଯେ ଛାତି ମୋର।

ସିଜରିଂ କରି କରିବାକୁ ଜନମ

ନଥିଲା ମୋପାଖେ କିଛି ବି ସକ୍ଷମ।

ବାଧ୍ୟହେଲି ହେବା ପାଇଁ ଘର ମୁହାଁ

ଅଧାବାଟେ ଜନ୍ମିଲା ମୋହର ଛୁଆ।

ନରମାଲ ଆଉ ସୁସ୍ଥ ଓ ସବଳ

ଦେଖ ଭାଇ ଆମ ସରକାରୀ କଳ।

ପରସେଣ୍ଟ ଲୋଭରେ ନର୍ସିଂହୋମକୁ

ପଠାନ୍ତି ସିଏ ନଡରି ଧର୍ମ କର୍ମକୁ।

ଏହିତ ଆମ ସରକାରୀ ଡାକତର

କରନ୍ତି ସେ ରୋଗୀଙ୍କର ଉପକାର।