ହସରୁ ଖୁସି
ହସରୁ ଖୁସି
ହସ ହସ ମୁଖ ଚାହିଁ ଦେଲେ ଦୂରୁ
ଲାଗଇ କି ଦିବ୍ୟ ଖୁସି
ମଉଜ ଭିତରେ ବୁଡି ରହି ଯାଇ
କେତେ ସ୍ୱପ୍ନ ହୁଏ ବିଞ୍ଚି ।
ସୁବାସିତ କରେ ପ୍ରାଣ ମନ ନିତି
ପୁଲକ ପ୍ଲାବନ ଖେଳେ
ଆନନ୍ଦ ଉଲ୍ଲାସ ଉଦ୍ଦୀପନା ପୂର୍ଣ୍ଣ
ଜୀବନ ଯାପନ କରେ ।
ହସି ହସି ପଦେ କଥା କହି ଦେଲେ
ପ୍ରାଣ ମନ ପୁଲକିତ
ସୁଦିବ୍ୟ ଭାବନା ନିମଗ୍ନ କରଇ
ସ୍ନେହ ଆଦର ଜାଗ୍ରତ ।
ହୋଇଥାଏ ଆନ ଚିତ୍ତେ ହସ ଖୁସି
ଆଦର ପ୍ରେମ ସନ୍ତୋଷ
ଶ୍ରଦ୍ଧା ଓ ସମ୍ମାନ ଶୃଙ୍ଖଳା ଆହ୍ଵାନ
ଭାବ ବହି ଆସେ ରସ ।
ଖୁସି ମାଦକତା ବୋଳା ପ୍ରୀତି ସ୍ରୋତ
ଦେଇ ମାନବୀୟ ବୋଧ
ଖୁସିର ଲହରୀ ଖେଳାଇ ଜୀବନେ
ପବିତ୍ର ଶାନ୍ତି ଆସ୍ଵାଦ ।
ଭରି ଦିଏ ନିତ୍ୟେ ମାନବ ଅନ୍ତରେ
ଯୋଗାଇ ପରାଣେ ଭାବ
ମଧୁର ମୂର୍ଚ୍ଛନା ଭାସି ଆସେ ଖୁସି
ମାଦକତା ଅଭିନବ ।