ମା' ଲୋ ତୁ ଆସିଛୁ ବୋଲି

ମା' ଲୋ ତୁ ଆସିଛୁ 

ସେଥିପାଇଁ ବୋଧେ

ଜୀବନ ଯନ୍ତ୍ରଣା ଯାଇଛି ଭୁଲି

 ପୟରେ ଶରଣ ଲୋଡୁଛି ବୋଲି ।

ମା' ଲୋ ତୁ ଆସିଛୁ 

ସେଥିପାଇଁ ବୋଧେ

ଆଖିର ନିଦକୁ ବିଦାୟ ଦେଲି

ତୋ ପଣତ ଆଶ୍ରା ଖୋଜୁଛି ବୋଲି ।

ମା' ଲୋ ତୁ ଆସିଛୁ 

ସେଥିପାଇଁ ବୋଧେ

ଲୁହକୁ ଗୁପତେ ସାଇତି ଥିଲି

 ଲୋତକେ ସଳିତା ଜାଳିବି ବୋଲି ।

ମା' ଲୋ ତୁ ଆସିଛୁ ବୋଲି

ଜଞ୍ଜାଳ ସବୁ ମୁଁ ଦେଇଛି ଠେଲି

ଜନନୀ ତୋ ସେବା କରିବି ବୋଲି ।

ମା' ଲୋ ତୁ ଆସିଛୁ 

ସେଥିପାଇଁ ବୋଧେ

ଅବୋଧତା ଫନ୍ଦେ ବନ୍ଧିତ ହେଲି

କ୍ଷମାମୟୀ କ୍ଷମା କରିବୁ ବୋଲି ।

ମା' ଲୋ ତୁ ଆସିଛୁ 

ସେଥିପାଇଁ ବୋଧେ

ଅନ୍ଧାର ପଥକୁ ଆଦର କଲି

ବାଟ ଅଡେଇ ତୁ ଆଣିବୁ ବୋଲି ।

ମା' ଲୋ ତୁ ଆସିଛୁ 

ସେଥିପାଇଁ ବୋଧେ

ଅଭିମାନ ସବୁ କରିଛି ମାଳି

ବିଦାୟ ବେଳରେ ଦେବି ମୁଁ ବୋଲି ।