ଅପେକ୍ଷା ତୁମକୁ

ସବୁ ଜାଣିଶୁଣି କାହିଁକି କେଜାଣି

ଭଲପାଏ ମୁଁ ତୁମକୁ

ମୋର ଜୀବନରେ ତୁମ ପରିଚୟ

ନୁହେଁ ତ ସବୁ ଦିନକୁ ।

ଆଜି ଅଛ ତୁମେ କାଲିକି ନଥିବ

ମୁଁ ସେମିତି ଏକା ଏକା

ଜୀବନରେ ଥରେ ତୁମ ସହ କେବେ

ହେବ କି ନହେବ ଦେଖା ।

ଦେଖିବାର ଇଚ୍ଛା କରିନାହିଁ କେବେ

ତୁମ ହୃଦୟକୁ ବୁଝେ

ତୁମ ହୃଦୟରେ ସାଇତିଛ ମତେ

ବୁଝି ପାରୁଛି ମୁଁ ଏବେ ।

ତୁମକୁ ପାଇବା ଜିଜ୍ଞାସା ମୋ ନାହିଁ

ସବୁ ସମୟର ଖେଳ

ସ୍ନେହ, ପ୍ରେମ ଆଉ ଶ୍ରଦ୍ଧା ବିତରି

ସରିଯାଉ ମୋର ବେଳ ।

ଏଇ ଜନମରେ ମିଳନ ନ ହେଉ

ବଢୁ ପ୍ରତୀକ୍ଷାର ଧାରା

ତଥାପି ବି ଭଲ ପାଉଛି ତୁମକୁ

ଭଲ ପାଇବି ଜୀବନସାରା ।

ସାତ ଜନମକୁ ସାଥୀ ହେଲ ନାହିଁ

ମୋ ହାତେ ଦେଲନି ଧରା

ଗୋଟେ କ୍ଷଣ ମିଶି ଯାହା ବି ଦେଇଛ

ସ୍ମୃତି ମୋ କବିତା ଝରା ।