Library
Profile
ପ୍ରେମର ସ୍ପର୍ଶ
ପ୍ରେମର ସ୍ପର୍ଶ
ଆଜି ପୁଣି କାହିଁକି ସେ ଅନ୍ୟମନସ୍କତା
କାହିଁ ପୁଣି ଆଜି ହଜିଯାଏ ମନଟା
ସେଇ ପୁରୁଣା ଦିନର ଅଫୁରନ୍ତ ପୁଲକିତ ଦିନ ମାନଙ୍କରେ
ଆଉ ମିଶି ଯାଏ ସେଇ ନିରବ ରାତିର ନିବିଡ଼ ଆଲିଙ୍ଗନରେ ।
ଖୋଜି ବୁଲେ କିଆଁ ଆଜି ତୁମ ଉଷୁମ ସ୍ପର୍ଶକୁ
ସେ ସ୍ପର୍ଶ ପରର ଶିହରଣକୁ
ମାଦକତା ଭରା ତୁମ ଅପଲକ ଦୁଇ ନୟନକୁ
ଯେଉଁ ଥିରୁ ଝରି ପଡୁ ଥାଏ ମୋ ପ୍ରତି
ଅନବିଳ ପ୍ରେମର ବାରିଧାରା ।
ଆଜି କାଇଁ ବ୍ୟତିବ୍ୟସ୍ତ ତୁମ ଉଛୁଳା ସ୍ରୋତସ୍ୱିନୀରେ
ପୁଣି ଥରେ ଭାସି ଯିବାକୁ
ପୁଣି ଥରେ ମିଶି ଯିବାକୁ ସେଇ ଗଭୀରତମ ଜଳରାଶିରେ
ଲୀନ ହୋଇ ଯିବାକୁ ତୁମ ପ୍ରେମର ଗର୍ଭ ଦେଶରେ ।
କ
ିଆଁ ଅବୁଝା ଶିଶୁ ପରି ଜିଦ ଧରେ ଆଜି ଏ ହୃଦୟଟା
ସତେ ଅବା ଏଇ ଏବେ କଇଁ କଇଁ କାନ୍ଦି ଉଠେ
ବାନ୍ଧି ହୋଇ ଯିବାକୁ ତୁମ ନିବିଡ ବାହୁ ବନ୍ଧନରେ
ଆବଦ୍ଧ ହୋଇ ରହିବାକୁ ତୁମ ହୃଦୟ ପିଞ୍ଜରାରେ ।
ଆଜି ପୁଣି ଲୁଚି ଯିବାକୁ ଅଧିର ଏ ମନ
ତୁମ ପ୍ରେମର ଘଞ୍ଚ ଅରଣ୍ୟରେ
ପୁଣି ଖେଳିବାକୁ ଇଚ୍ଛା ହୁଏ ଲୁଚକାଳି ଖେଳ
ଦେଖିବାକୁ ତୁମ ଉନ୍ମାଦନା ମୋତେ ପାଇବାକୁ ।
ଆସ ଥରେ ଆଜି ହେ ପ୍ରିୟତମ
ପୁଣି ଥରେ ଆଙ୍କି ଦିଅ ତୁମ ପ୍ରେମ ରଙ୍ଗତୂଳି ଧରି
ପୁଣି ଚିତ୍ରିତ ହୋଇ ଯାଉ ମୋ ଫିକା ବନାନୀ
ପ୍ଲାବିତ ହେଉ ଶୁଷ୍କ ନିର୍ଝରଣୀ
ତୁମ ଶାଶ୍ୱତ ପ୍ରେମର ଅନ୍ତରଙ୍ଗ ଆଲିଙ୍ଗନରେ ।
