ପରେ କହିବି
ପରେ କହିବି
ପ୍ରାପ୍ତି ଅପ୍ରାପ୍ତିର
ସୀମାରେଖା ଟାଣି ଦେଇ,
ତୁମେ ବିଦାୟ ନେଲ
ଆଗ କଥା ସବୁ
"ପରେ କହିବି" କହି ।।
ମୁଁ ଅଟକି ଯାଏ
ସେହି ସ୍ଥାନରେ
ଯେଉଁଠି ତୁମେ ହାତ ଛାଡ଼ି
ଚାଲିଯାଅ, ତୁମ ଅନ୍ତପୁରେ;
ତା ପରେ; ସମ୍ମୁଖେ ଗଢ଼ି ଉଠେ
ଆଗତ ଭବିଷ୍ୟର ସମ୍ଭାବନାମୟ ଆକାଶ
ଜନ୍ମ ନିଏ କେତେ କେତେ ଅଭିଳାଷ
ପୁଣି, ମନେ ଉଙ୍କି ମାରେ ଅସଂଖ୍ୟ ଅସୁମାରି ପ୍ରଶ୍ନ
ଚେତନା ଚୈତନ୍ୟ ହରାଇ, ଚିନ୍ତେ !
କେତେ ସୁଦୀର୍ଘ,କେତେ ପରିବ୍ୟାପ୍ତ,
ପ୍ରେମର ଏ ସୁନ୍ଦର ଉପବନ
ଯହିଁ ପାଦେ ପାଦେ ଭେଟେ ମୁହିଁ
ଅନିଶ୍ଚିତ ଆକର୍ଷଣ ଓ ଅସ୍ପଷ୍ଟ ଆତଙ୍କର ଚିହ୍ନ ।।
ନା ସେ ଅନିଶ୍ଚିତ ଆକର୍ଷଣକୁ
ହୃଦ ପଞ୍ଜୁରୀରେ
ପ୍ରୀତିର ଡୋରିରେ ବାନ୍ଧି ପାରୁଛି,
ନା ସେ ଅସ୍ପଷ୍ଟ ଆତଙ୍କକୁ
ମନର ମୁକ୍ତକାଶେ
ନିର୍ଦ୍ୱନ୍ଦରେ ଉଡ଼େଇ ଦେଇ ପାରୁଛି,
କେବଳ !
ଆକଣ୍ଠ ଉଦରସ୍ଥ ଏକ ସୁଦୀର୍ଘ ନିଶ୍ୱାସ ନେଇ
ମୁଁ ଅଟକି ଯାଏ,
ତୁମେ ଫେରିଗଲା ପରେ
ଆଗ କଥା ସବୁ
"ପରେ କହିବି" କହି !