સિત્તેરનો થયો તું બાંકે પ્યારે

બીપી, ડાયાબિટીસ રાખ કાબુમાં ભાવતાં ભોજન છોડને,

સુપ, સલાડ ને ફળ ખા, સિત્તેરનો થયો તું બાંકે પ્યારે !

કલાક આઠ પૂરાં સુઈ છોડતાં પથારી બે ઘડી ખમજે,

મલાજો રાખ મગજનો, સિત્તેરનો થયો બાંકે પ્યારે !

હળવી કસરત, ચાલવું નિયમિત તંદુરસ્તીના નિયમ બનાવજે,

કકળાટ મોબાઈલનો કર ઓછો, સિત્તેરનો થયો બાંકે પ્યારે !

પગથિયાં પડશે ભારે, મચકોડાશે પગ જ્યારે,

રાખ મલાજો ઉંમરનો, સિત્તેરનો થયો બાંકે પ્યારે !

ચાલશે, મટી જશે, ઘરગથ્થુ ઈલાજ કરીએ છીએ ને,

એવા વહેમમાં રહેવું ના, સિત્તેરનો થયો તું બાંકે પ્યારે !

દવા તરીકે દારૂ બહુ પીધો, હવે દવાની જરૂર તારે,

મલાજો રાખ લિવરનો, સિત્તેરનો થયો બાંકે પ્યારે !

કાઢ્યા ઘણા વર્ષો ઉપાડી ભાર, ટટ્ટાર ચાલવું છે ને,

વજન કર હળવું સિત્તેરનો થયો તું બાંકે પ્યારે !

અહમ્ છોડ, શોખ ફરવાનો કરવા પૂરો ગાડી ભાડે કરને,

ભય અકસ્માતનો બહુ હવે, સિત્તેરનો થયો બાંકે પ્યારે !

જીવનભર કર્યું વૈતરું હવે ટેસડા કરવાનો સમય કાઢજે,

ખરચ પૈસા મોજમાં રહેવા, સિત્તેરનો થયો બાંકે પ્યારે !

બચાવી રાખ ખુદને સાટું સ્વાભિમાનથી જીવવા જોઈશે ને,

બધું દે ના લૂંટાવી સૌ પર, સિત્તેરનો થયો તું બાંકે પ્યારે !

શોખ બધાં કરી લે પૂરાં, મરવાનાં વાંકે થોડું જીવાય છે ?

મોત અફસોસરહિત માણ, સિત્તેરનો થયો તું બાંકે પ્યારે !