ગાયોનું રસ્તા-રોકો આંદોલન

રસ્તામાં રોકીને મને કહે એક ગાય,

હું અહીં ઊભી ને તું આમ ક્યાં જાય ?

 

અમે તો છીએ માતા, તમે અમ પુત્ર,

ચાલ્યો ક્યાં આચમનમાં લીધા વિના ગૌમૂત્ર !

 

ગાયનું રાખી માન, રસ્તો મેં બદલ્યો,

ત્યાં પાંચ ગૌ-પુત્રીઓએ ડોળા કાઢી આંતર્યો.

 

માંડ માંડ શોધી સાંકડી એક શેરી,

અલમસ્ત ગાય ઘૂરકી, શીદને થાશ વેરી ?

 

માંડી બીજી શેરીમાં ઘરડી ગાયે મોકાણ,

મુજ બુઢીને કરીશ ઊભી ? આપી દઈશ આણ !

 

બધેથી બચતો બચતો મોટા રસ્તે ગયો,

જોયું ગાયોનું ટોળું, ને બેભાન જેવો થયો.

 

હિંમત કરી આગળ વધ્યો, માંડ રસ્તો થાય,

ઓફિસમાં બોસ તાડૂક્યા, "આટલું મોડું કરાય ?"