મગર પાછળ દોડે છે ઉંદર
મગર પાછળ દોડે છે ઉંદર
ચિન્ટુના મનની વાત છે !
જો કેવી મજાની વાત છે!
કોઈ અલગ મલકની વાત છે,
આ સરસ મજાની વાત છે!
અહી ભડભડ બળતા ચંદામામા (૨)
અને ઠંડા ઠંડા સુરજદાદા,
ચકલી મીઠ્ઠું મીઠ્ઠું બોલે
‘ને કાબર કરે છે ટહુકા ન્યારા ! જો અલગ.
એ હાથી ઉડે...એ ઘોડા ઉડે...
એ હાથી ઉડે, ઘોડા ઉડે,
પગ છે તોયે પાંખો છે જોડે,
છે માછલીઓનો માળો સુંદર,
‘ને મગ્ગર પાછળ દોડે છે ઉંદર ! જો અલગ.
વાદળીઓ આવી વ્હાલી કરી જાય,
અને આભ ક્યાંક લીલુંછમ થઇ જાય,
તડકાને તેજે અહીંતો વરસાદના ફૂવારા થઇ જાય,
પલકવારમાં દરિયો જાણે ખલખલ કરતું ઝરણું થઇ જાય ! જો અલગ.
એ ઉઠ... એ સંભાળે છે ? (૨)
અરે ઉઠ ચિન્ટુ, હવે ઉઠે છે કે રેડું પાણી ?
આમ અચાનક મમ્મીની રાડે નીંદર તૂટી ગઈ,
‘ને ત્યાં જ ચિન્ટુના સ્વપ્નોની દુનિયા અદ્રશ્ય થઇ ગઈ ! જો અલગ.
જો કેવી મજાની વાત છે !
જો કેવી મજાની વાત છે!
કોઈ અલગ મલકની વાત છે,
આ સરસ મજાની વાત છે!