બચપણના દિવસો

કિટ્ટા બુચ્ચા એ બચપણના દિવસો કેવા મજાના,

જિંદગીની એ મજાને સખી આજ ફરીને જીવીએ,  

ચાલને સંતાકુકડી રમીએ !

સૂર્યકિરણ પર્ણો પર વરસતા

ઝાકળબુંદ ઝગમગ થાય

અંધકારના ઓળા પછીતે 

પ્રકાશપુંજ ઝળહળ થાય

ઝગમગ થાતા ઝાકળ જેવા સોનેરી ઝળહળીએ

ચાલને સાતતાળી રમીએ ! 

દાદીમાની પરીકથા સાંભળીને

એ દેશમાં આપણે ફરીએ 

ચકા ચકીની વાર્તા ફરી કહીને 

વાતોમાં આજ વિહરીએ

પાંખ પહેરીને પરીની જેમ આકાશમાં સહુ ઊડીએ

ચાલને પાંચીકા દાવ રમીએ !

બચપણ માણ્યું ઘડપણ આવ્યું

એક દિવસ તો અહીંથી જવાનું

લઈ આવ્યા શું લઈ જવાના

આવો સહુ આમ વ્હાલ કરીએ 

બચપણની દુનિયામાં જઈને ફરી બાળક બનીએ

ચાલને થપ્પો દાવ રમીએ !

કિટ્ટા બુચ્ચા એ બચપણના દિવસો કેવા મજાના,

જિંદગીની એ મજાને સખી આજ ફરી જીવીએ,

ચાલને પકડા પકડી રમીએ !