अशी सजली कोजागिरी

कोजागर्ती वदे लक्ष्मी 

पुनवेला कोजागिरी

सडा चांदण्यांचा पडे

चंद्र वसुंधरेवरी

शुभ्र धवल चांदणे

नील अंबरी पाझरे

फेर भोवती नक्षत्रे

मनी रोहिणी बावरे

चमचम तारे नभी

दिव्य शुक्लेंदु उजळे

तेज बरसे चंद्रमा

सृष्टी हर्षाने उमले

गंधाळली वसुंधरा

सुगंधाने मनोमनी

प्रेमिकांच्या भावनांना

मुग्धताच भावे मनी

शुभ्र चांदणे विहरे

तेजोत्सव नभांतरी

रंग प्रेमाचा बहरे

उमलत्या पुष्पापरि

चंद्र आणि चांदण्यांची

रासक्रीडा नभी रंगे

चाले अपूर्व सोहळा

उषःकाल लालीसंगे