पतंग
पतंग
आयुष्याचा पतंग उडवायला..
मांजा माझ्याच हाती हवा ,
हवेचं काहीच खरं नसतं
तिला लागतो पतंग नित्य नवा !
शर्यतीत भाग नाही घ्यायचा..
पण..ध्येय बाळगून आहे आगळं ,
उंचच उंच उडण्याच्या नादात
नको मध्येच कापलं जाणं !
गुंतागुंतीच्या गोंधळात..
मार्ग जातो आपलाच विरून ,
पुन्हा तोच मांजा अन् पतंग
तिकडेच अडकतात फिरून..फिरवून !
तू पण नको उडू..मी पण नाही..
एकमेकांना खाली खेळण्याच्या खेळात ,
दोरी तुटतेच पतंगांची साऱ्या
अंतर प्रगतीचे कापण्यात !
हक्क आहेच सर्वांना..
उंचच उंच उडण्याचा ,
आपापलं उडावं ना मस्त..मुक्त
जसे आकाशात विहरतात विहंग !
ते नाही ताणत एकमेकांचे दोर..
खेचून नाही टाकत पंख ,
भ्रमणमार्गात असणाऱ्यांचा
करत नाहीत शंख !