चैतन्य

कुजबुज शांततेची..

आला घेऊन हिवाळा ,

हिमकण सजवत

उत्सवाचा पावसाळा !

झाडांवर थर शुभ्र..

झाली हिमवृष्टी खूप ,

चोहीकडे बर्फातून

डोकावते हृद्य रूप !

नदी गोठली थरांत ..

तिची थांबे चंचलता ,

थरांखाली मात्र तिच्या

झरा चैतन्य वाहता !

एक वाट जाते मध्ये..

दोन्ही पर्वत बाजूस ,

माती दिसतही नाही

जणू सर्वत्र कापूस !

थंडी गुलाबी बोचरी..

तिला उन सोसवेना ,

ढग आडवे येतात

तिचा मोह सोडवेना !

आली होऊनिया स्वार..

लाट थंड झुळूकीची ,

सारे गारठले फार

ऊब आवडे आगीची !